1. Kico ta un archivo? Kico tin warda na ANA y desde ki aña?
Un archivo ta un documento, mapa, potret y material audio-visual cu ta original y autentico cu ta wordo warda den e deposito di ANA. ANA ta encarga pa warda, cuida y proteha e archivo di Gobierno cu tin un balor historico pa Aruba. E documento mas bieu cu tin warda ta e Rekwestenboek di e Commandeur Lodewijk Christoph Boyé cual ta data 1816.
2. Tur e documentonan na ANA ta wordo warda pa semper?
E seccion di Seleccion Central di Archivo ta encarga cu e seleccion y inventarisacion di archivo. E archivo ta wordo inventarisa y poni den un lista, pa asina traha un plan di procedimento pa nan permanencia den e depositonan.
3. Kico ta pasa cu e documento despues di su termino? Por djies tire afor? Mester pidi permiso? Y na unda ta tira e documentonan aki afor?
A base di e seleccion y inventarisacion di archivo, e plan di procedimento pa nan permanencia den e depositonan ta wordo stipula. Despues cu e fecha pasa, e archivonan ta wordo destrui (vernietigd) y ta traha un procesverbaal di e sucedido.
4. Mi tin un spreekbeurt pa scol, ANA por yuda mi?
E seccion di Servicio ta encarga cu e servicio general na e bishitantenan di ANA, dor di ofrece e bishitantenan un centro di documentacion y informacion, un sala di estudio, biblioteca y facilidad pa Internet. Pa spreekbeurten ANA por pone e informacion na disposicion di e studiante pa asina e mes haci su investigacion.
5. Tin un ley di archivo?
Tin un concepto di ley cu mester wordo aproba pa Parlamento di Aruba. Pero, si ta traha a base di e ley. E seccion di Maneho y Investigacion ta encarga pa sostene y duna conseho riba e maneho general di e departamento y riba tereno y investigacion di archivo. Ta haci inspeccion di archivo pa cumplimento cu e leynan y duna conseho riba durabilidad digital.
6. ANA por pasa film bieu pa un grupo wak? Por haci un rondleiding?
E seccion di Servicio ta desaroya programa(nan) educativo entre otro, curso, lectura, exposicion, workshop, evenemento y publicacion pa e publico en general y principalmente pa esnan interesa den e historia di nos pais. Pa haci un cita por tuma contacto cu Studiezaal (tel. 583-4880)
7. Mi ta buscando potret, informacion pero mi no sa e fecha, con mi por haya esaki?
Den e sala di estudio di ANA por consulta y haya acceso na:
- Documentonan (si nan ta documentonan publico)
- Videonan digitalisa di e coleccion audio-visual di BUVO (Bureau Voorlichting Aruba)
- Coleccion di potretnan digitalisa
- Documentaciona y Publicacionnan
- Copia y scan documentonan – potret – video
8. Con e archivonan ta warda y cuida?
E seccion di Conservacion y Maneho ta encarga pa mantene y cuida e archivo cu a wordo traspasa pa ANA, e cuido di e deposito(nan) y preservacion di archivo pa medio di restauracion, conservacion y digitalisacion.
9. Mi kier traha un stamboom di mi famia, pero mi no sa e nomber nan. Te ki aña mi stamboom ta bai?
Un investigacion genealogico ta ensera: informacion di persona y ancestronan (fecha di nacemento, fecha di fayecimento, fecha di casamento, ofishi cu e persona a eherce ect). Te ki aña por bai, ta depende di e informacion di famia cu wordo haya.
E stamboom ta un investigacion di famia y no ta pa uso legal (por ehempel pa notario). Pa e Stamboom pa uso legal mester acudi na Censo www.censo.aw
10. Mi kier bini pa haci un onderzoek? Mi mester paga? Mi mester traha un afspraak?
Pa haci investigacion archivistico (p.e. investigacion di famia y documentonan) por haya asistencia di e Seccion di Servicio di ANA. E investigacion ta wordo haci dor di e peticionario y si mester haya documentonan, por pidi asistencia (no mester paga pa e servicio). E documentonan mas bieu y fragil por wordo mira
solamente den nan version digital. Por saca potret di documentonan, pero mester pidi permiso na personal di ANA y ta
prohibi pa usa flash. Pa haci investigacion archivistico mester tene cuenta cu e reglanan existente.
Un afspraak pa haci investigacion no ta necesario.
