Organisacion
Archivo Nacional Aruba (ANA), prome yama Archivo Historico Nacional (Nationaal Historisch Archief), ta un departamento di Gobierno desde 1 augustus 1994. E departamento a carga e nomber aki te na 2005. Despues a cambia e nomber pa Archivo Nacional Aruba, pa asina duna mas acogida y reconocimento di e trabounan cu e departamento ta eherce.
ANA ta e departamento di Gobierno cu ta encarga pa warda, cuida y proteha e archivo di Gobierno cu tin un balor historico pa Aruba, na disposicion di esnan cu kier haci investigacion, esnan cu ta buscando informacion y tambe pa e futuro generacion cu kier sa mas di e historia di nos pais.
Den e coleccion di archivo tin documento, mapa, potret y material audio-visual. E coleccion di ANA ta ensera archivo di Gobierno y of di persona y instancia(nan) particular.
E documento mas bieu cu tin warda ta e Rekwestenboek di e Commandeur Lodewijk Christoph Boyé cual ta data 1816.
Actualmente ANA ta maneha rond di 15 kilometro di archivo, mas 1250 cinta di material audio-visual y mas cu 100.000 potret historico di Aruba.
Structura di organisacion
E organisacion di ANA ta wordo dirigi pa un hefe y e personal trahando na ANA ta encarga cu e procesonan primario y of sostene e procesonan di e organisacion.
E seccion(nan) cu ta encarga cu e procesonan primario di e organisacion:
Seccion Central di Archivo (Afdeling Centraal Archief Selectie)
Seccion Conservacion y Maneho (Afdeling Archief Behoud en Beheer)
Seccion Servicio (Afdeling Dienstverlening)
E seccion(nan) cu ta encarga pa sostene e procesonan di e organisacion:
Seccion Maneho y Investigacion (Afdeling Beleid en Onderzoek)
Seccion Operacional (Afdeling Bedrijfsvoering)
Hefe di Archivo Nacional Aruba – Hoofd van Dienst ANA
E hefe di ANA ta encarga cu e maneho general, pa duna contenido na e desaroyo y realisacion di e maneho y e sosten na e Minister di Asuntonan General dunando forma e maneho di archivo pa pais Aruba. E hefe alabes ta supervisa e cuido y perservacion di depositonan nacional di archivo y ta encarga pa e aplicacion corecto di e ley y condicionnan pa cu e archivo.
Seccion Central di Archivo – Afdeling Centraal Archief Selectie
E seccion Central di Archivo ta encarga cu e seleccion y inventarisacion di archivo. E archivo ta wordo inventarisa y poni den un lista, pa asina traha un plan di procedimento pa nan permanencia den e depositonan.
Seccion Conservacion y Maneho – Afdeling Archief Behoud en Beheer
E seccion di Conservacion y Maneho ta encarga pa mantene y cuida e archivo cu a wordo traspasa pa ANA, e cuido di e deposito(nan) y preservacion di archivo pa medio di restauracion, conservacion y digitalisacion.
Seccion di Servicio – Afdeling Dienstverlening
E seccion di Servicio ta encarga cu e servicio general na e bishitantenan di ANA, dor di ofrece e bishitantenan un centro di documentacion y informacion, un sala di estudio, biblioteca y facilidad pa Internet. Desaroya programa(nan) educativo entre otro, curso, lectura, exposicion, workshop, evenemento y publicacion pa e publico en general y principalmente pa esnan interesa den e historia di nos pais.
Seccion Maneho y Investigacion – Afdeling Beleid en Onderzoek
E seccion di Maneho y Investigacion ta encarga pa sostene y duna conseho riba e maneho general di e departamento y riba tereno y investigacion di archivo. Alaves ta sostene e departamento den e ehecucion y implementacion di e maneho. Ta haci inspeccion di archivo pa cumplimento cu e leynan, duna conseho riba durabilidad digital y investigacion historico riba e historia skirbi y oral di Aruba y skirbi raport di e investigacion.
Seccion Operacional – Afdeling Bedrijfsvoering
E seccion Operacional ta encarga pa facilita y sostene e procesonan primario di ANA, entre otro dor di ta encarga cu e presupuesto y administracion financiero, administracion general y di asuntonan di personal, supervision y mantencion di e edificio y tereno.
